Eventiada Awards 2025 միջազգային մրցանակաբաշխությունը հայտեր է ընդունում հայերենով

Հայկական Փի Ար ասոցիացիայի գործընկեր Eventiada Awards 2025-ը շարունակում է հայտերի ընդունումը՝ այս տարի աշխարհի բոլոր լեզուներով։ Eventiada Awards-ը հաղորդակցության ոլորտի ամենամեծ մրցանակաբաշխությունն է, որը որևէ սահմանափակում չի դնում լեզվի առումով։ Մրցույթին կարող են մասնակցել նախագծեր, որոնք իրականացվել են 2024 թ․ սեպտեմբերի 1-ից մինչև 2025 թ․ օգոստոսի 31-ը, անկախ աշխարհագրությունից։ Մասնակցության պայմաններին կարելի է ծանոթանալ և հայտերը ներկայացնել ավելի քանի 40 անվանակարգերում մրցանակաբաշխության պաշտոնական կայքում՝ www.eventiada.com։

🔹 Մրցանակաբաշխության ձևաչափը

Այս տարի մրցանակաբաշխությունը տեղի կունենա 14-րդ անգամ և կպարգևատրի լավագույն հաղորդակցական նախագծերը հետևյալ ուղղություններով․

• Գովազդ և մարքեթինգային հաղորդակցություններ,

• Կորպորատիվ և բիզնես հաղորդակցություններ,

• Կայուն զարգացում,

• Անհատական և երիտասարդական անվանակարգեր։

Լավագույն աշխատանքները կընտրվեն փորձագիտական խորհրդի և միջազգային ժյուրիի կողմից, որտեղ ներգրավված կլինի նաև արհեստական բանականություն։ Ի դեպ, Հայկական Փի Ար ասոցիացիայի նախագահ Աստղիկ Ավետիսյանը ևս ժյուրիի կազմում է։

🔹 Միջազգային նշանակություն

2011 թվականին հիմնադրված Eventiada Awards միջազգային մրցանակաբաշխությունը համարվում է հաղորդակցության ոլորտի զարգացման ամենակարևոր հարթակներից մեկը։ Այն խրախուսում է տաղանդավոր մասնագետներին և նպաստում նորարարական մոտեցումների տարածմանը։ 14 տարվա ընթացքում մրցույթին ներկայացվել է մոտ 9000 հայտ 23 երկրից։

2025 թվականին մրցանակաբաշխությունն առաջին անգամ կընդունի հայտեր աշխարհի բոլոր լեզուներով։ Սա հնարավորություն է տալիս մասնակիցներին կենտրոնանալ բուն նախագծի որակի վրա՝ առանց լեզվական խոչընդոտների։

🔹 Նորամուծություններ

Այս տարվա նորամուծություններից է նաև տարածաշրջանային Գրան Պրի համակարգի ներդրումը, որը թույլ կտա յուրաքանչյուր տարածաշրջանում ճանաչել լավագույն ստեղծագործական և արդյունավետ նախագծերը։

Նախատեսվում է նաև մոդուլային գների համակարգ, իսկ գործընկեր ասոցիացիաների անդամները կստանան հատուկ զեղչեր։

🔹 Գրաֆիկ

Մարտ 2025 – հայտերի ընդունման մեկնարկ

30 սեպտեմբեր 2025 – հայտերի ընդունման ավարտ

1-15 հոկտեմբեր 2025 – փորձագիտական խորհրդի քվեարկություն, shortlist

16-30 հոկտեմբեր 2025 – ժյուրիի քվեարկություն, հաղթողների որոշում

25 նոյեմբեր 2025 – մրցանակաբաշխության պաշտոնական արարողություն

🔹 Գործընկեր կազմակերպություններ

Eventiada Awards-ը կազմակերպում է «Орта» ընկերությունը՝ համագործակցելով Հայկական PR Ասոցիացիայի (ArmPR.org), Մենեջերների ասոցիացիայի (Ռուսաստան), АКАР (Ռուսաստան), Ուզբեկստանի մարքեթինգային ասոցիացիայի, Բելառուսի հաղորդակցային և մարքեթինգային գործակալությունների ասոցիացիայի, Մոլդովայի գովազդային գործակալությունների ասոցիացիայի, ինչպես նաև ոլորտի այլ մասնագիտական միավորումների հետ։

Մրցանակաբաշխության ինֆորմացիոն գործընկերներն են՝ ТАСС, News.ru, АиФ։